Napanood mo ba ito?



Dito sa BlueMumble, susubukan kong gawing simple ang pagtatayo ng blog para sa Pilipino. Yung hindi ka mahihirapan, at mawawalan ka ng mga dahilang “Hindi ako marunong sa Internet e” o kaya “wala akong perang pansugal dyan” o ang mas malala : “palagay ko hindi naman talaga ako kikita dyan. Ang Internet ay hindi para sa o maka-Pilipino.”

Ano ang punto ng website na ito?

  • Madali lang ang matutong mag-blog gamit ang Internet, lalo na habang nagtatagal. Kung marunong kang gumamit ng Friendster, walang kahirap-hirap dapat para sa’yo ang mag-blog. Napakarami dyang mga website na pwede mong pagsimulan: gaya ng Blogger o kaya ng WordPress. Ang mga iyan ang dalawang pinakasikat na nagbibigay ng libreng blog para sa sino man sa buong mundo, basta’t meron ka lang e-mail address. Kung sa palagay mo ay gusto mo lamang subukan ang pagb-blog, magandang magsimula ka muna sa mga yan. (Trivia: Hindi mo naitatanong, pero nagsimula ang blog namin sa wordpress, at buhay pa ito hanggang ngayon.) Wala rin akong kaalam-alam sa pagb-blog dati; sa katunayan ngayong taon lang ako natuto. Pero tignan mo ko at sumusubok na kaagad tumulong sa ibang Pilipino upang matutong mag-blog.
  • Hindi mo kailangan ng malaking pera. Kung may Internet ka na sa bahay ngayon, aba’y pwede ka ng magsimula ng bagong business! At kahit wala kang Internet connection sa bahay.. Sigurado naman akong nag-iinternet ka pa rin sa labas, kaya mo nga nababasa ang sinulat kong ito. Sa pagb-blog, pangalawa lamang na dapat isipin ang paggastos. Ang talagang makakatulong sa iyo ay imahinasyon, tiyaga, at paglalaan ng oras. Sa libreng Blogger, posible na kaagad ang kumita sapagkat hinahayaan na nilang maglagay ng advertisements sa kani-kanilang blog ang mga bloggers. Para naman sa gustong magkaroon ng sarili nilang domain name, kagaya ng website na ito, murang halaga lang ang talagang magagastos mo gamit ang Ploghost. Kung di ka pa rin naniniwala na hindi mo kelangan ng malaking pera para lang makapag-blog, ako mismo ay nag-aalok ng libreng blog dito sa BlueMumble, hangga’t naniniwala akong maraming magbabasa ng blog idea mo.
  • Ang Internet ay para sa lahat. Marahil kilala mo na sina Sergey Brin at Larry Page ng Google, Mark Zuckerberg ng Facebook, at lalong-lalo na si Bill Gates ng Microsoft. Ilan lang sila sa mga sikat na yumaman dahilan sa software at sa Internet. Araw-araw, maraming tao sa bawat sulok ng mundo ang yumayaman din sa pagwe-website. Binago na ng Internet ang kakayahan ng taong humanap ng ikabubuhay. Impormasyon at Ideya: yan na sukatan ng bawat nagtatagumpay na business sa ngayon. Ngunit hindi ba’t ang Pilipino ay likas na creative o malikhain? Mula sa pagkanta, pagsusulat, hanggang sa katalinuhan—angking-galing yan ng Pilipino. Kung gayon, kung ang Internet ay isa sa mga paraang maaaring gamitin ng Pilipino upang iahon ang sarili, pamilya at ang kanyang bayan sa hirap, bakit hindi natin baligtarin ang naunang pahayag, at sabihing “ANG INTERNET AY PARA SA PILIPINO.“?

Marahil hindi pa rin sapat ang tatlong pahayag ko upang baguhin ang anumang naunang reaksyon ng sinumang mambabasa ukol sa kapangyarihan ng ideya at ng Internet. Ang punto ko lang naman: walang mawawala kung susubukan mo. Sabi ko nga rito, maraming Pilipino ang nagsasayang ng oras habang nagi-Internet.

Kung nakumbinsi na kita, marahil itatanong mo ngayon kung paano ba ang mag-blog? Yan ang papel ng blog na ito: ang tulungan kang magsimula, at magpanatili ng isang blog na magta-trabaho ng 24 na oras, 7 araw sa isang linggo para sa’yo. Isa lang ang hindi ko kayang gawin, at iyon ang pinaka-importante para sa blog mo. Ito ay ang sabihin sa iyo ang sagot sa tanong na: Ano ang iyong ib-blog? Yan ang kailangan mong sagutin sa sarili mo mismo para naman hindi sabihin ng ibang bloggers na napakapal yata ang papel na BlueMumble. Kung may iba kang taong kakilala na sumubok ng mag-blog at hindi kumita dito, yan ay dahil hindi nila nasagot ng maayos ang tanong na iyan. Simpleng tanong.. pero importante ang sagot.

Maaari akong magbigay ng ilang maaring pagsimulan ng sarili mong blog, pero gaya nga ng sinabi ko, hindi ako ang sasagot sa tanong na iyon. Kung may naisip man ako sa aking sarili na magandang i-blog, aba e di ako na ang gagawa nun, basta kaya ko! Hehe. Heto at sana’y makatulong ang mga sumusunod para sa iyo.

  • Magsimula sa mga hilig mo. Sa anong paksa ka mag-eenjoy magsulat?
  • Sino ang mga magbabasa ng blog mo? Marami ba sila? Taga-saan? Kaya mo bang mang-akit ng 2500 katao na bumisita sa blog mo araw-araw?
  • Sino ang mga unang makaka-alam ng mga sinulat mo? Matutulungan ka ba nilang ipagsabi ito?
  • Maging malikhain. Kung marami ng gumagawa ng naisip mong i-blog, mas malaki ang tsansa na hindi na papatok ang blog na igagaya mo lang sa blog nila.
  • Magsaliksik ng mabuti. Nasa tamang daan ka sa pagbabasa ng artikulong ito, pero napakarami mo pang dapat malaman at makikita mo ang karamihan sa mga iyon sa Internet.
  • Tanawin at abangan ang susunod na alon. Gaya ng anumang business, mas malaki ang kikitain mo kung ikaw ang mauuna. Maraming nagb-blog ngayon tungkol sa entertainment, sa pinoy big brother, sa francswiss at HYIP’s, sa stocks, sa Pilipino blogging, at kung ano man ang mga website na pinuntahan mo at binalik-balikan tungkol sa mga paksang ito, iyon ay dahil sila ang naunang magtayo ng blog para dito.

Iyan muna. Susubukan ko silang dagdagan habang lumalago ang ating karanasan sa pagb-blog. Kung sa puntong ito ay naniniwala kang naisip mo na ang pinakamagandang paksa upang i-blog, inaanyayahan kitang sundan ang mga subok ko nang gawain sa paggawa at pagpapanatili ng isang blog.

Ako nga pala si Dark Knight, at ang BlueMumble ang blog ko.

Technorati Tags: ,